या इन्द्र भुज आभरः स्वर्वाँ असुरेभ्यः । स्तोतारमिन्मघवन्नस्य वर्धय ये च त्वे वृक्तबर्हिषः ॥
yā indra bhuja ābharaḥ svarvām̐ asurebhyaḥ । stotāraminmaghavannasya vardhaya ye ca tve vṛktabarhiṣaḥ ॥
प्र मित्राय प्रार्यम्णे सचथ्यमृतावसो । वरूथ्ये३ वरुणे छन्द्यं वचः स्तोत्रँ राजसु गायत ॥
pra mitrāya prāryamṇe sacathyamṛtāvaso । varūthye३ varuṇe chandyaṃ vacaḥ stotram̐ rājasu gāyata ॥
अभि त्वा पूर्वपीतय इन्द्र स्तोमेभिरायवः । समीचीनास ऋभवः समस्वरन्रुद्रा गृणन्त पूर्व्यम् ॥
abhi tvā pūrvapītaya indra stomebhirāyavaḥ । samīcīnāsa ṛbhavaḥ samasvaranrudrā gṛṇanta pūrvyam ॥
प्र व इन्द्राय बृहते मरुतो ब्रह्मार्चत । वृत्रँ हनति वृत्रहा शतक्रतुर्वज्रेण शतपर्वणा ॥
pra va indrāya bṛhate maruto brahmārcata । vṛtram̐ hanati vṛtrahā śatakraturvajreṇa śataparvaṇā ॥
बृहदिन्द्राय गायत मरुतो वृत्रहन्तमम् । येन ज्योतिरजनयन्नृतावृधो देवं देवाय जागृवि ॥
bṛhadindrāya gāyata maruto vṛtrahantamam । yena jyotirajanayannṛtāvṛdho devaṃ devāya jāgṛvi ॥
इन्द्र क्रतुं न आ भर पिता पुत्रेभ्यो यथा । शिक्षा णो अस्मिन्पुरुहूत यामनि जीवा ज्योतिरशीमहि ॥
indra kratuṃ na ā bhara pitā putrebhyo yathā । śikṣā ṇo asminpuruhūta yāmani jīvā jyotiraśīmahi ॥
मा न इन्द्र परा वृणग्भवा नः सधमाद्ये । त्वं न ऊती त्वमिन्न आप्यम् मा न इन्द्र परा वृणक् ॥
mā na indra parā vṛṇagbhavā naḥ sadhamādye । tvaṃ na ūtī tvaminna āpyam mā na indra parā vṛṇak ॥
वयं घ त्वा सुतावन्त आपो न वृक्तबर्हिषः । पवित्रस्य प्रस्रवणेषु वृत्रहन्परि स्तोतार आसते ॥
vayaṃ gha tvā sutāvanta āpo na vṛktabarhiṣaḥ । pavitrasya prasravaṇeṣu vṛtrahanpari stotāra āsate ॥
यदिन्द्र नाहुषीष्वा ओजो नृम्णं च कृष्टिषु । यद्वा पञ्च क्षितीनां द्युम्नमा भर सत्रा विश्वानि पौँस्या ॥
yadindra nāhuṣīṣvā ojo nṛmṇaṃ ca kṛṣṭiṣu । yadvā pañca kṣitīnāṃ dyumnamā bhara satrā viśvāni paum̐syā ॥
सत्यमित्था वृषेदसि वृषजूतिर्नोऽविता । वृषा ह्युग्र शृण्विषे परावति वृषो अर्वावति श्रुतः ॥
satyamitthā vṛṣedasi vṛṣajūtirno'vitā । vṛṣā hyugra śaṛṇviṣe parāvati vṛṣo arvāvati śrutaḥ ॥
यच्छक्रासि परावति यदर्वावति वृत्रहन् । अतस्त्वा गीर्भिर्द्युगदिन्द्र केशिभिः सुतावाँ आ विवासति ॥
yacchakrāsi parāvati yadarvāvati vṛtrahan । atastvā gīrbhirdyugadindra keśibhiḥ sutāvām̐ ā vivāsati ॥
अभि वो वीरमन्धसो मदेषु गाय गिरा महा विचेतसम् । इन्द्रं नाम श्रुत्यँ शाकिनं वचो यथा ॥
abhi vo vīramandhaso madeṣu gāya girā mahā vicetasam । indraṃ nāma śrutyam̐ śākinaṃ vaco yathā ॥
इन्द्र त्रिधातु शरणं त्रिवरूथँ स्वस्तये । छर्दिर्यच्छ मघवद्भ्यश्च मह्यं च यावया दिद्युमेभ्यः ॥
indra tridhātu śaraṇaṃ trivarūtham̐ svastaye । chardiryaccha maghavadbhyaśca mahyaṃ ca yāvayā didyumebhyaḥ ॥
श्रायन्त इव सूर्यं विश्वेदिन्द्रस्य भक्षत । वसूनि जातो जनिमान्योजसा प्रति भागं न दीधिमः ॥
śrāyanta iva sūryaṃ viśvedindrasya bhakṣata । vasūni jāto janimānyojasā prati bhāgaṃ na dīdhimaḥ ॥
न सीमदेव आप तदिषं दीर्घायो मर्त्यः । एतग्वा चिद्या एतशो युयोजत इन्द्रो हरी युयोजते ॥
na sīmadeva āpa tadiṣaṃ dīrghāyo martyaḥ । etagvā cidyā etaśo yuyojata indro harī yuyojate ॥
आ नो विश्वासु हव्यमिन्द्रँ समत्सु भूषत । उप ब्रह्माणि सवनानि वृत्रहन्परमज्या ऋचीषम ॥
ā no viśvāsu havyamindram̐ samatsu bhūṣata । upa brahmāṇi savanāni vṛtrahanparamajyā ṛcīṣama ॥
तवेदिन्द्रावमं वसु त्वं पुष्यसि मध्यमम् । सत्रा विश्वस्य परमस्य राजसि न किष्ट्वा गोषु वृण्वते ॥
tavedindrāvamaṃ vasu tvaṃ puṣyasi madhyamam । satrā viśvasya paramasya rājasi na kiṣṭvā goṣu vṛṇvate ॥
क्वेयथ क्वेदसि पुरुत्रा चिद्धि ते मनः । अलर्षि युध्म खजकृत्पुरन्दर प्र गायत्रा अगासिषुः ॥
kveyatha kvedasi purutrā ciddhi te manaḥ । alarṣi yudhma khajakṛtpurandara pra gāyatrā agāsiṣuḥ ॥
वयमेनमिदा ह्योपीपेमेह वज्रिणम् । तस्मा उ अद्य सवने सुतं भरा नूनं भूषत श्रुते ॥
vayamenamidā hyopīpemeha vajriṇam । tasmā u adya savane sutaṃ bharā nūnaṃ bhūṣata śrute ॥
यो राजा चर्षणीनां याता रथेभिरध्रिगुः । विश्वासां तरुता पृतनानां ज्येष्ठं यो वृत्रहा गृणे ॥
yo rājā carṣaṇīnāṃ yātā rathebhiradhriguḥ । viśvāsāṃ tarutā pṛtanānāṃ jyeṣṭhaṃ yo vṛtrahā gṛṇe ॥
यत इन्द्र भयामहे ततो नो अभयं कृधि । मघवञ्छग्धि तव तन्न ऊतये वि द्विषो वि मृधो जहि ॥
yata indra bhayāmahe tato no abhayaṃ kṛdhi । maghavañchagdhi tava tanna ūtaye vi dviṣo vi mṛdho jahi ॥
वास्तोष्पते ध्रुवा स्थूणाँ सत्रँ सोम्यानाम् । द्रप्सः पुरां भेत्ता शश्वतीनामिन्द्रो मुनीनाँ सखा ॥
vāstoṣpate dhruvā sthūṇām̐ satram̐ somyānām । drapsaḥ purāṃ bhettā śaśvatīnāmindro munīnām̐ sakhā ॥
बण्महाँ असि सूर्य बडादित्य महाँ असि । महस्ते सतो महिमा पनिष्टम मह्ना देव महाँ असि ॥
baṇmahām̐ asi sūrya baḍāditya mahām̐ asi । mahaste sato mahimā paniṣṭama mahnā deva mahām̐ asi ॥
अश्वी रथी सुरूप इद्गोमाँ यदिन्द्र ते सखा । श्वात्रभाजा वयसा सचते सदा चन्द्रैर्याति सभामुप ॥
aśvī rathī surūpa idgomām̐ yadindra te sakhā । śvātrabhājā vayasā sacate sadā candrairyāti sabhāmupa ॥
यद्द्याव इन्द्र ते शतँ शतं भूमीरुत स्युः । न त्वा वज्रिन्त्सहस्रँ सूर्या अनु न जातमष्ट रोदसी ॥
yaddyāva indra te śatam̐ śataṃ bhūmīruta syuḥ । na tvā vajrintsahasram̐ sūryā anu na jātamaṣṭa rodasī ॥
यदिन्द्र प्रागपागुदग्न्यग्वा हूयसे नृभिः । सिमा पुरू नृषूतो अस्यानवेऽसि प्रशर्ध तुर्वशे ॥
yadindra prāgapāgudagnyagvā hūyase nṛbhiḥ । simā purū nṛṣūto asyānave'si praśardha turvaśe ॥
कस्तमिन्द्र त्वा वसवा मर्त्यो दधर्षति । श्रद्धा हि ते मघवन्पार्ये दिवि वाजी वाजँ सिषासति ॥
kastamindra tvā vasavā martyo dadharṣati । śraddhā hi te maghavanpārye divi vājī vājam̐ siṣāsati ॥
इन्द्राग्नी अपादियं पूर्वागात्पद्वतीभ्यः । हित्वा शिरो जिह्वया रारपच्चरत्त्रिँशत्पदा न्यक्रमीत् ॥
indrāgnī apādiyaṃ pūrvāgātpadvatībhyaḥ । hitvā śiro jihvayā rārapaccarattrim̐śatpadā nyakramīt ॥
इन्द्र नेदीय एदिहि मितमेधाभिरूतिभिः । आ शं तम शं तमाभिरभिष्टिभिरा स्वापे स्वापिभिः ॥
indra nedīya edihi mitamedhābhirūtibhiḥ । ā śaṃ tama śaṃ tamābhirabhiṣṭibhirā svāpe svāpibhiḥ ॥
इत ऊती वो अजरं प्रहेतारमप्रहितम् । आशुं जेतारँ हेतारँ रथीतममतूर्तं तुग्रियावृधम् ॥
ita ūtī vo ajaraṃ prahetāramaprahitam । āśuṃ jetāram̐ hetāram̐ rathītamamatūrtaṃ tugriyāvṛdham ॥
