इन्दो यथा तव स्तवो यथा ते जातमन्धसः । नि बर्हिषि प्रिये सदः ॥
indo yathā tava stavo yathā te jātamandhasaḥ । ni barhiṣi priye sadaḥ ॥
उत नो गोविदश्ववित्पवस्व सोमान्धसा । मक्षूतमेभिरहभिः ॥
uta no govidaśvavitpavasva somāndhasā । makṣūtamebhirahabhiḥ ॥
यो जिनाति न जीयते हन्ति शत्रुमभीत्य । स पवस्व सहस्रजित् ॥
yo jināti na jīyate hanti śatrumabhītya । sa pavasva sahasrajit ॥
यास्ते धारा मधुश्चुतोऽसृग्रमिन्द ऊतये । ताभिः पवित्रमासदः ॥
yāste dhārā madhuścuto'sṛgraminda ūtaye । tābhiḥ pavitramāsadaḥ ॥
सो अर्षेन्द्राय पीतये तिरो वाराण्यव्यया । सीदन्नृतस्य योनिमा ॥
so arṣendrāya pītaye tiro vārāṇyavyayā । sīdannṛtasya yonimā ॥
त्वँ सोम परि स्रव स्वादिष्ठो अङ्गिरोभ्यः । वरिवोविद्धृतं पयः ॥
tvam̐ soma pari srava svādiṣṭho aṅgirobhyaḥ । varivoviddhṛtaṃ payaḥ ॥
तव श्रियो वर्ष्यस्येव विद्युतोग्नेश्चिकित्र उषसामिवेतयः । यदोषधीरभिसृष्टो वनानि च परि स्वयं चिनुषे अन्नमासनि ॥
tava śriyo varṣyasyeva vidyutogneścikitra uṣasāmivetayaḥ । yadoṣadhīrabhisṛṣṭo vanāni ca pari svayaṃ cinuṣe annamāsani ॥
वातोपजूत इषितो वशाँ अनु तृषु यदन्ना वेविषद्वितिष्ठसे । आ ते यतन्ते रथ्यो३ यथा पृथक्षर्धाँस्यग्ने अजरस्य धक्षतः ॥
vātopajūta iṣito vaśām̐ anu tṛṣu yadannā veviṣadvitiṣṭhase । ā te yatante rathyo३ yathā pṛthakṣardhām̐syagne ajarasya dhakṣataḥ ॥
मेधाकारं विदथस्य प्रसाधनमग्निँ होतारं परिभूतरं मतिम् । त्वामर्भस्य हविषः समानमित्तवां महो वृणते नान्यं त्वत् ॥
medhākāraṃ vidathasya prasādhanamagnim̐ hotāraṃ paribhūtaraṃ matim । tvāmarbhasya haviṣaḥ samānamittavāṃ maho vṛṇate nānyaṃ tvat ॥
पुरूरुणा चिद्ध्यस्त्यवो नूनं वां वरुण । मित्र वँसि वाँ सुमतिम् ॥
purūruṇā ciddhyastyavo nūnaṃ vāṃ varuṇa । mitra vam̐si vām̐ sumatim ॥
ता वाँ सम्यगद्रुह्वाणेषमश्याम धाम च । वयं वां मित्रा स्याम ॥
tā vām̐ samyagadruhvāṇeṣamaśyāma dhāma ca । vayaṃ vāṃ mitrā syāma ॥
पातं नो मित्रा पायुभिरुत त्रायेथाँ सुत्रात्रा । साह्याम दस्यूं तनूभिः ॥
pātaṃ no mitrā pāyubhiruta trāyethām̐ sutrātrā । sāhyāma dasyūṃ tanūbhiḥ ॥
उत्तिष्ठन्नोजसा सह पीत्वा शिप्रे अवेपयः । सोममिन्द्र चमूसुतम् ॥
uttiṣṭhannojasā saha pītvā śipre avepayaḥ । somamindra camūsutam ॥
अनु त्वा रोदसी उभे स्पर्धमानमददेताम् । इन्द्र यद्दस्युहाभवः ॥
anu tvā rodasī ubhe spardhamānamadadetām । indra yaddasyuhābhavaḥ ॥
वाचमष्टापदीमहं नवस्रक्तिमृतावृधम् । इन्द्रात्परितन्वं ममे ॥
vācamaṣṭāpadīmahaṃ navasraktimṛtāvṛdham । indrātparitanvaṃ mame ॥
इन्द्राग्नी युवामिमे३ऽभि स्तोमा अनूषत । पिबतँ शम्भुवा सुतम् ॥
indrāgnī yuvāmime३'bhi stomā anūṣata । pibatam̐ śambhuvā sutam ॥
या वाँ सन्ति पुरुस्पृहो नियुतो दाशुषे नरा । इन्द्राग्नी ताभिरा गतम् ॥
yā vām̐ santi puruspṛho niyuto dāśuṣe narā । indrāgnī tābhirā gatam ॥
ताभिरा गच्छतं नरोपेदँ सवनँ सुतम् । इन्द्राग्नी सोमपीतये ॥
tābhirā gacchataṃ naropedam̐ savanam̐ sutam । indrāgnī somapītaye ॥
अर्षा सोम द्युमत्तमोऽभि द्रोणानि रोरुवत् । सीदन्योनौ योनेष्वा ॥
arṣā soma dyumattamo'bhi droṇāni roruvat । sīdanyonau yoneṣvā ॥
अप्सा इन्द्राय वायवे वरुणाय मरुद्भ्यः । सोमा अर्षन्तु विष्णवे ॥
apsā indrāya vāyave varuṇāya marudbhyaḥ । somā arṣantu viṣṇave ॥
इषं तोकाय नो दधदस्मभ्यँ सोम विश्वतः । आ पवस्व सहस्रिणम् ॥
iṣaṃ tokāya no dadhadasmabhyam̐ soma viśvataḥ । ā pavasva sahasriṇam ॥
सोम उ ष्वाणः सोतृभिरधि ष्णुभिरवीनाम् । अश्वयेव हरिता याति धारया मन्द्रया याति धारया ॥
soma u ṣvāṇaḥ sotṛbhiradhi ṣṇubhiravīnām । aśvayeva haritā yāti dhārayā mandrayā yāti dhārayā ॥
अनूपे गोमान्गोभिरक्षाः सोमो दुग्धाभिरक्षाः । समुद्रं न संवरणान्यग्मन्मन्दी मदाय तोशते ॥
anūpe gomāngobhirakṣāḥ somo dugdhābhirakṣāḥ । samudraṃ na saṃvaraṇānyagmanmandī madāya tośate ॥
यत्सोम चित्रमुक्थ्यं दिव्यं पार्थिवं वसु । तन्नः पुनान आ भर ॥
yatsoma citramukthyaṃ divyaṃ pārthivaṃ vasu । tannaḥ punāna ā bhara ॥
वृषा पुनान आयुँषि स्तनयन्नधि बर्हिषि । हरिः सन्योनिमासदः ॥
vṛṣā punāna āyum̐ṣi stanayannadhi barhiṣi । hariḥ sanyonimāsadaḥ ॥
युवँ हि स्थः स्वःपती इन्द्रश्च सोम गोपती । ईशाना पिप्यतं धियः ॥
yuvam̐ hi sthaḥ svaḥpatī indraśca soma gopatī । īśānā pipyataṃ dhiyaḥ ॥
इन्द्रो मदाय वावृधे शवसे वृत्रहा नृभिः । तमिन्महत्स्वाजिषूतिमर्भे हवामहे स वाजेषु प्र नोऽविषत् ॥
indro madāya vāvṛdhe śavase vṛtrahā nṛbhiḥ । taminmahatsvājiṣūtimarbhe havāmahe sa vājeṣu pra no'viṣat ॥
असि हि वीर सेन्योऽसि भूरि पराददिः । असि दभ्रस्य चिद्वृधो यजमानाय शिक्षसि सुन्वते भूरि ते वसु ॥
asi hi vīra senyo'si bhūri parādadiḥ । asi dabhrasya cidvṛdho yajamānāya śikṣasi sunvate bhūri te vasu ॥
यदुदीरत आजयो धृष्णवे धीयते धनाम् । युङ्क्ष्वा मदच्युता हरी कं हनः कं वसौ दधोऽस्मां इन्द्र वसौ दधः ॥
yadudīrata ājayo dhṛṣṇave dhīyate dhanām । yuṅkṣvā madacyutā harī kaṃ hanaḥ kaṃ vasau dadho'smāṃ indra vasau dadhaḥ ॥
स्वादोरित्था विषूवतो मध्वः पिबन्ति गौर्यः । या इन्द्रेण सयावरीर्वृष्णा मदन्ति शोभसे वस्वीरनु स्वराज्यम् ॥
svādoritthā viṣūvato madhvaḥ pibanti gauryaḥ । yā indreṇa sayāvarīrvṛṣṇā madanti śobhase vasvīranu svarājyam ॥
