स्वरन्ति त्वा सुते नरो वसो निरेक उक्थिनः । कदा सुतं तृषाण ओक आ गम इन्द्र स्वब्दीव वँसगः ॥
svaranti tvā sute naro vaso nireka ukthinaḥ । kadā sutaṃ tṛṣāṇa oka ā gama indra svabdīva vam̐sagaḥ ॥
कण्वेभिर्धृष्णवा धृषद्वाजं दर्षि सहस्रिणम् । पिशङ्गरूपं मघवन्विचर्षणे मक्षू गोमन्तमीमहे ॥
kaṇvebhirdhṛṣṇavā dhṛṣadvājaṃ darṣi sahasriṇam । piśaṅgarūpaṃ maghavanvicarṣaṇe makṣū gomantamīmahe ॥
तरणिरित्सिषासति वाजं पुरन्ध्या युजा । आ व इन्द्रं पुरुहूतं नमे गिरा नेमिं तष्टेव सुद्रुवम् ॥
taraṇiritsiṣāsati vājaṃ purandhyā yujā । ā va indraṃ puruhūtaṃ name girā nemiṃ taṣṭeva sudruvam ॥
न दुष्टुतिर्द्रविणोदेषु शस्यते न स्रेधन्तँ रयिर्नशत् । सुशक्तिरिन्मघवं तुभ्यं मावते देष्णं यत्पार्ये दिवि ॥
na duṣṭutirdraviṇodeṣu śasyate na sredhantam̐ rayirnaśat । suśaktirinmaghavaṃ tubhyaṃ māvate deṣṇaṃ yatpārye divi ॥
तिस्रो वाच उदीरते गावो मिमन्ति धेनवः । हरिरेति कनिक्रदत् ॥
tisro vāca udīrate gāvo mimanti dhenavaḥ । harireti kanikradat ॥
अभि ब्रह्मीरनूषत यह्वीरृतस्य मातरः । मर्जयन्तीर्दिवः शिशुम् ॥
abhi brahmīranūṣata yahvīrṛtasya mātaraḥ । marjayantīrdivaḥ śiśum ॥
रायः समुद्राँश्चतुरोऽस्मभ्यँ सोम विश्वतः । आ पवस्व सहस्रिणः ॥
rāyaḥ samudrām̐ścaturo'smabhyam̐ soma viśvataḥ । ā pavasva sahasriṇaḥ ॥
सुतासो मधुमत्तमाः सोमा इन्द्राय मन्दिनः । पवित्रवन्तो अक्षरं देवान्गच्छन्तु वो मदाः ॥
sutāso madhumattamāḥ somā indrāya mandinaḥ । pavitravanto akṣaraṃ devāngacchantu vo madāḥ ॥
इन्दुरिन्द्राय पवत इति देवासो अब्रुवन् । वाचस्पतिर्मखस्यते विश्वस्येशान ओजसाः ॥
indurindrāya pavata iti devāso abruvan । vācaspatirmakhasyate viśvasyeśāna ojasāḥ ॥
सहस्रधारः पवते समुद्रो वाचमीङ्खयः । सोमस्पती रयीणाँ सखेन्द्रस्य दिवेदिवे ॥
sahasradhāraḥ pavate samudro vācamīṅkhayaḥ । somaspatī rayīṇām̐ sakhendrasya divedive ॥
पवित्रं ते विततं ब्रह्मणस्पते प्रभुर्गात्राणि पर्येषि विश्वतः । अतप्ततनूर्न तदामो अश्नुते शृतास इद्वहन्तः सं तदाशत ॥
pavitraṃ te vitataṃ brahmaṇaspate prabhurgātrāṇi paryeṣi viśvataḥ । ataptatanūrna tadāmo aśnute śaṛtāsa idvahantaḥ saṃ tadāśata ॥
तपोष्पवित्रं विततं दिवस्पदेऽर्चन्तो अस्य तन्तवो व्यस्थिरन् । अवन्त्यस्य पवीतारमाशवो दिवः पृष्ठमधि रोहन्ति तेजसा ॥
tapoṣpavitraṃ vitataṃ divaspade'rcanto asya tantavo vyasthiran । avantyasya pavītāramāśavo divaḥ pṛṣṭhamadhi rohanti tejasā ॥
अरूरुचदुषसः पृश्निरग्रिय उक्षा मिमेति भुवनेषु वाजयुः । मायाविनो ममिरे अस्य मायया नृचक्षसः पितरो गर्भमा दधुः ॥
arūrucaduṣasaḥ pṛśniragriya ukṣā mimeti bhuvaneṣu vājayuḥ । māyāvino mamire asya māyayā nṛcakṣasaḥ pitaro garbhamā dadhuḥ ॥
प्र मँहिष्ठाय गायत ऋताव्ने बृहते शुक्रशोचिषे । उपस्तुतासो अग्नये ॥
pra mam̐hiṣṭhāya gāyata ṛtāvne bṛhate śukraśociṣe । upastutāso agnaye ॥
आ वँसते मघवा वीरवद्यशः समिद्धो द्युम्न्याहुतः । कुविन्नो अस्य सुमतिर्भवीयस्यच्छा वाजेभिरागमत् ॥
ā vam̐sate maghavā vīravadyaśaḥ samiddho dyumnyāhutaḥ । kuvinno asya sumatirbhavīyasyacchā vājebhirāgamat ॥
तं ते मदं गृणीमसि वृषणं पृक्षु सासहिम् । उ लोककृत्नुमद्रिवो हरिश्रियम् ॥
taṃ te madaṃ gṛṇīmasi vṛṣaṇaṃ pṛkṣu sāsahim । u lokakṛtnumadrivo hariśriyam ॥
येन ज्योतीँष्यायवे मनवे च विवेदिथ । मन्दानो अस्य बर्हिषो वि राजसि ॥
yena jyotīm̐ṣyāyave manave ca viveditha । mandāno asya barhiṣo vi rājasi ॥
तदद्या चित्त उक्थिनोऽनु ष्टुवन्ति पूर्वथा । वृषपत्नीरपो जया दिवेदिवे ॥
tadadyā citta ukthino'nu ṣṭuvanti pūrvathā । vṛṣapatnīrapo jayā divedive ॥
श्रुधी हवं तिरश्च्या इन्द्र यस्त्वा सपर्यति । सुवीर्यस्य गोमतो रायस्पूर्धि महाँ असि ॥
śrudhī havaṃ tiraścyā indra yastvā saparyati । suvīryasya gomato rāyaspūrdhi mahām̐ asi ॥
यस्त इन्द्र नवीयसीं गिरं मन्द्रामजीजनत् । चिकित्विन्मनसं धियं प्रत्नामृतस्य पिप्युषीम् ॥
yasta indra navīyasīṃ giraṃ mandrāmajījanat । cikitvinmanasaṃ dhiyaṃ pratnāmṛtasya pipyuṣīm ॥
तमु ष्टवाम यं गिर इन्द्रमुक्थानि वावृधुः । पुरूण्यस्य नौँस्या सिषासन्तो वनामहे ॥
tamu ṣṭavāma yaṃ gira indramukthāni vāvṛdhuḥ । purūṇyasya naum̐syā siṣāsanto vanāmahe ॥
