अग्निं वो वृधन्तमध्वराणां पुरूतमम् । अच्छा नप्त्रे सहस्वते ॥
agniṃ vo vṛdhantamadhvarāṇāṃ purūtamam । acchā naptre sahasvate ॥
अयं यथा न आभुवत्त्वष्टा रूपेव तक्ष्या । अस्य क्रत्वा यशस्वतः ॥
ayaṃ yathā na ābhuvattvaṣṭā rūpeva takṣyā । asya kratvā yaśasvataḥ ॥
अयं विश्वा अभि श्रियोऽग्निर्देवेषु पत्यते । आ वाजैरुप नो गमत् ॥
ayaṃ viśvā abhi śriyo'gnirdeveṣu patyate । ā vājairupa no gamat ॥
इममिन्द्र सुतं पिब ज्येष्ठममर्त्यं मदम् । शुक्रस्य त्वाभ्यक्षरन्धारा ऋतस्य सादने ॥
imamindra sutaṃ piba jyeṣṭhamamartyaṃ madam । śukrasya tvābhyakṣarandhārā ṛtasya sādane ॥
न किष्ट्वद्रथीतरो हरी यदिन्द्र यच्छसे । न किष्ट्वानु मज्मना न किः स्वश्व आनशे ॥
na kiṣṭvadrathītaro harī yadindra yacchase । na kiṣṭvānu majmanā na kiḥ svaśva ānaśe ॥
इन्द्राय नूनमर्चतोक्थानि च ब्रवीतन । सुता अमत्सुरिन्दवो ज्येष्ठं नमस्यता सहः ॥
indrāya nūnamarcatokthāni ca bravītana । sutā amatsurindavo jyeṣṭhaṃ namasyatā sahaḥ ॥
इन्द्र जुषस्व प्र वहा याहि शूर हरिह । पिबा सुतस्य मतिर्न मधोश्चकानश्चारुर्मदाय ॥
indra juṣasva pra vahā yāhi śūra hariha । pibā sutasya matirna madhoścakānaścārurmadāya ॥
इन्द्र जठरं नव्यं न पृणस्व मधोर्दिवो न । अस्य सुतस्य स्वा३र्नोप त्वा मदाः सुवाचो अस्थुः ॥
indra jaṭharaṃ navyaṃ na pṛṇasva madhordivo na । asya sutasya svā३rnopa tvā madāḥ suvāco asthuḥ ॥
इन्द्रस्तुराषाण्मित्रो न जघान वृत्रं यतिर्न । बिभेद वलं भृगुर्न ससाहे शत्रून्मदे सोमस्य ॥
indrasturāṣāṇmitro na jaghāna vṛtraṃ yatirna । bibheda valaṃ bhṛgurna sasāhe śatrūnmade somasya ॥
गोवित्पवस्व वसुविद्धिरण्यविद्रेतोधा इन्दो भुवनेष्वर्पितः । त्वँ सुवीरो असि सोम विश्ववित्तं त्वा नर उप गिरेम आसते ॥
govitpavasva vasuviddhiraṇyavidretodhā indo bhuvaneṣvarpitaḥ । tvam̐ suvīro asi soma viśvavittaṃ tvā nara upa girema āsate ॥
त्वं नृचक्षा असि सोम विश्वतः पवमान वृषभ ता वि धावसि । स नः पवस्व वसुमद्धिरण्यवद्वयँ स्याम भुवनेषु जीवसे ॥
tvaṃ nṛcakṣā asi soma viśvataḥ pavamāna vṛṣabha tā vi dhāvasi । sa naḥ pavasva vasumaddhiraṇyavadvayam̐ syāma bhuvaneṣu jīvase ॥
ईशान इमा भुवनानि ईयसे युजान इन्दो हरितः सुपर्ण्यः । तास्ते क्षरन्तु मधुमद्घृतं पयस्तव व्रते सोम तिष्ठन्तु कृष्टयः ॥
īśāna imā bhuvanāni īyase yujāna indo haritaḥ suparṇyaḥ । tāste kṣarantu madhumadghṛtaṃ payastava vrate soma tiṣṭhantu kṛṣṭayaḥ ॥
पवमानस्य विश्ववित्प्र ते सर्गा असृक्षत । सूर्यस्येव न रश्मयः ॥
pavamānasya viśvavitpra te sargā asṛkṣata । sūryasyeva na raśmayaḥ ॥
केतुं कृण्वं दिवस्परि विश्वा रूपाभ्यर्षसि । समुद्रः सोम पिन्वसे ॥
ketuṃ kṛṇvaṃ divaspari viśvā rūpābhyarṣasi । samudraḥ soma pinvase ॥
जज्ञानो वाचमिष्यसि पवमान विधर्मणि । क्रन्दं देवो न सूर्यः ॥
jajñāno vācamiṣyasi pavamāna vidharmaṇi । krandaṃ devo na sūryaḥ ॥
प्र सोमासो अधन्विषुः पवमानास इन्दवः । श्रीणाना अप्सु वृञ्जते ॥
pra somāso adhanviṣuḥ pavamānāsa indavaḥ । śrīṇānā apsu vṛñjate ॥
अभि गावो अधन्विषुरापो न प्रवता यतीः । पुनाना इन्द्रमाशत ॥
abhi gāvo adhanviṣurāpo na pravatā yatīḥ । punānā indramāśata ॥
प्र पवमान धन्वसि सोमेन्द्राय मादनः । नृभिर्यतो वि नीयसे ॥
pra pavamāna dhanvasi somendrāya mādanaḥ । nṛbhiryato vi nīyase ॥
इन्दो यदद्रिभिः सुतः पवित्रं परिदीयसे । अरमिन्द्रस्य धाम्ने ॥
indo yadadribhiḥ sutaḥ pavitraṃ paridīyase । aramindrasya dhāmne ॥
त्वँ सोम नृमादनः पवस्व चर्षणीधृतिः । सस्निर्यो अनुमाद्यः ॥
tvam̐ soma nṛmādanaḥ pavasva carṣaṇīdhṛtiḥ । sasniryo anumādyaḥ ॥
पवस्व वृत्रहन्तम उक्थेभिरनुमाद्यः । शुचिः पावको अद्भुतः ॥
pavasva vṛtrahantama ukthebhiranumādyaḥ । śuciḥ pāvako adbhutaḥ ॥
शुचिः पावक उच्यते सोमः सुतः स मधुमान् । देवावीरघशँसहा ॥
śuciḥ pāvaka ucyate somaḥ sutaḥ sa madhumān । devāvīraghaśam̐sahā ॥
प्र कविर्देववीतयेऽव्या वारेभिरव्यत । साह्वान्विश्वा अभि स्पृधः ॥
pra kavirdevavītaye'vyā vārebhiravyata । sāhvānviśvā abhi spṛdhaḥ ॥
स हि ष्मा जरितृभ्य आ वाजं गोमन्तमिन्वति । पवमानः सहस्रिणम् ॥
sa hi ṣmā jaritṛbhya ā vājaṃ gomantaminvati । pavamānaḥ sahasriṇam ॥
परि विश्वानि चेतसा मृज्यसे पवसे मती । स नः सोम श्रवो विदः ॥
pari viśvāni cetasā mṛjyase pavase matī । sa naḥ soma śravo vidaḥ ॥
अभ्यर्ष बृहद्यशो मघवद्भ्यो ध्रुवँ रयिम् । इषँ स्तोतृभ्य आ भर ॥
abhyarṣa bṛhadyaśo maghavadbhyo dhruvam̐ rayim । iṣam̐ stotṛbhya ā bhara ॥
त्वँ राजेव सुव्रतो गिरः सोमाविवेशिथ । पुनानो वह्ने अद्भुत ॥
tvam̐ rājeva suvrato giraḥ somāviveśitha । punāno vahne adbhuta ॥
स वह्निरप्सु दुष्टरो मृज्यमानो गभस्त्योः । सोमश्चमूषु सीदति ॥
sa vahnirapsu duṣṭaro mṛjyamāno gabhastyoḥ । somaścamūṣu sīdati ॥
क्रीडुर्मखो न मँहयुः पवित्रँ सोम गच्छसि । दधत्स्तोत्रे सुवीर्यम् ॥
krīḍurmakho na mam̐hayuḥ pavitram̐ soma gacchasi । dadhatstotre suvīryam ॥
यवंयवं नो अन्धसा पुष्टंपुष्टं परि स्रव । विश्वा च सोम सौभगा ॥
yavaṃyavaṃ no andhasā puṣṭaṃpuṣṭaṃ pari srava । viśvā ca soma saubhagā ॥
