इयं वामस्य मन्मन इन्द्राग्नी पूर्व्यस्तुतिः । अभ्राद्वृष्टिरिवाजनि ॥
iyaṃ vāmasya manmana indrāgnī pūrvyastutiḥ । abhrādvṛṣṭirivājani ॥
शृणुतं जरितुर्हवमिन्द्राग्नी वनतं गिरः । ईशाना पिप्यतं धियः ॥
śaṛṇutaṃ jariturhavamindrāgnī vanataṃ giraḥ । īśānā pipyataṃ dhiyaḥ ॥
मा पापत्वाय नो नरेन्द्राग्नी माभिशस्तये । मा नो रीरधतं निदे ॥
mā pāpatvāya no narendrāgnī mābhiśastaye । mā no rīradhataṃ nide ॥
पवस्व दक्षसाधनो देवेभ्यः पीतये हरे । मरुद्भ्यो वायवे मदः ॥
pavasva dakṣasādhano devebhyaḥ pītaye hare । marudbhyo vāyave madaḥ ॥
सं देवैः शोभते वृषा कविर्योनावधि प्रियः । पवमानो अदाभ्यः ॥
saṃ devaiḥ śobhate vṛṣā kaviryonāvadhi priyaḥ । pavamāno adābhyaḥ ॥
पवमान धिया हितो३ऽभि योनिं कनिक्रदत् । धर्मणा वायुमारुहः ॥
pavamāna dhiyā hito३'bhi yoniṃ kanikradat । dharmaṇā vāyumāruhaḥ ॥
तवाहँ सोम रारण सख्य इन्दो दिवेदिवे । पुरूणि बभ्रो नि चरन्ति मामव परिधीँ रति ताँइहि ॥
tavāham̐ soma rāraṇa sakhya indo divedive । purūṇi babhro ni caranti māmava paridhīm̐ rati tām̐ihi ॥
तवाहं नक्तमुत सोम ते दिवा दुहानो बभ्र ऊधनि । घृणा तपन्तमति सूर्यं परः शकुना इव पप्तिम ॥
tavāhaṃ naktamuta soma te divā duhāno babhra ūdhani । ghṛṇā tapantamati sūryaṃ paraḥ śakunā iva paptima ॥
पुनानो अक्रमीदभि विश्वा मृधो विचर्षणिः । शुम्भन्ति विप्रं धीतिभिः ॥
punāno akramīdabhi viśvā mṛdho vicarṣaṇiḥ । śumbhanti vipraṃ dhītibhiḥ ॥
आ योनिमरुणो रुहद्गमदिन्द्रं वृषा सुतम् । ध्रुवे सदसि सीदतु ॥
ā yonimaruṇo ruhadgamadindraṃ vṛṣā sutam । dhruve sadasi sīdatu ॥
नू नो रयिं महामिन्दोऽस्मभ्यँ सोम विश्वतः । आ पवस्व सहस्रिणम् ॥
nū no rayiṃ mahāmindo'smabhyam̐ soma viśvataḥ । ā pavasva sahasriṇam ॥
पिबा सोममिन्द्र मदन्तु त्वा यं ते सुषाव हर्यश्वाद्रिः । सोतुर्बाहुभ्याँ सुयतो नार्वा ॥
pibā somamindra madantu tvā yaṃ te suṣāva haryaśvādriḥ । soturbāhubhyām̐ suyato nārvā ॥
यस्ते मदो युज्यश्चारुरस्ति येन वृत्राणि हर्यश्व हँसि । स त्वामिन्द्र प्रभूवसो ममत्तु ॥
yaste mado yujyaścārurasti yena vṛtrāṇi haryaśva ham̐si । sa tvāmindra prabhūvaso mamattu ॥
बोधा सु मे मघवन्वाचमेमां यां ते वसिष्ठो अर्चति प्रशस्तिम् । इमा ब्रह्म सधमादे जुषस्व ॥
bodhā su me maghavanvācamemāṃ yāṃ te vasiṣṭho arcati praśastim । imā brahma sadhamāde juṣasva ॥
विश्वाः पृतना अभिभूतरं नरः सजूस्ततक्षुरिन्द्रं जजनुश्च राजसे । क्रत्वे वरे स्थेमन्यामुरीमुतोग्रमोजिष्ठं तरसं तरस्विनम् ॥
viśvāḥ pṛtanā abhibhūtaraṃ naraḥ sajūstatakṣurindraṃ jajanuśca rājase । kratve vare sthemanyāmurīmutogramojiṣṭhaṃ tarasaṃ tarasvinam ॥
नेमिं नमन्ति चक्षसा मेषं विप्रा अभिस्वरे । सुदीतयो वो अद्रुहोऽपि कर्णे तरस्विनः समृक्वभिः ॥
nemiṃ namanti cakṣasā meṣaṃ viprā abhisvare । sudītayo vo adruho'pi karṇe tarasvinaḥ samṛkvabhiḥ ॥
समु रेभसो अस्वरन्निन्द्रँ सोमस्य पीतये । स्वःपतिर्यदी वृधे धृतव्रतो ह्योजसा समूतिभिः ॥
samu rebhaso asvarannindram̐ somasya pītaye । svaḥpatiryadī vṛdhe dhṛtavrato hyojasā samūtibhiḥ ॥
यो राजा चर्षणीनां याता रथेभिरध्रिगुः । विश्वासां तरुता पृतनानां ज्येष्ठं यो वृत्रहा गृणे ॥
yo rājā carṣaṇīnāṃ yātā rathebhiradhriguḥ । viśvāsāṃ tarutā pṛtanānāṃ jyeṣṭhaṃ yo vṛtrahā gṛṇe ॥
इन्द्रं तँ शुम्भ्य पुरुहन्मन्नवसे यस्य द्विता विधर्त्तरि । हस्तेन वज्रः प्रति धायि दर्शतो महां देवो न सूर्यः ॥
indraṃ tam̐ śumbhya puruhanmannavase yasya dvitā vidharttari । hastena vajraḥ prati dhāyi darśato mahāṃ devo na sūryaḥ ॥
परि प्रिया दिवः कविर्वयाँसि नप्त्योर्हितः । स्वानैर्याति कविक्रतुः ॥
pari priyā divaḥ kavirvayām̐si naptyorhitaḥ । svānairyāti kavikratuḥ ॥
स सूनुर्मातरा शुचिर्जातो जाते अरोचयत् । महान्मही ऋतावृधा ॥
sa sūnurmātarā śucirjāto jāte arocayat । mahānmahī ṛtāvṛdhā ॥
प्रप्र क्षयाय पन्यसे जनाय जुष्टो अद्रुहः । वीत्यर्ष पनिष्टये ॥
prapra kṣayāya panyase janāya juṣṭo adruhaḥ । vītyarṣa paniṣṭaye ॥
त्वँ ह्या३ँङ्ग दैव्या पवमान जनिमानि द्युमत्तमः । अमृतत्वाय घोषयन् ॥
tvam̐ hyā३m̐ṅga daivyā pavamāna janimāni dyumattamaḥ । amṛtatvāya ghoṣayan ॥
येना नवग्वो दध्यङ्ङपोर्णुते येन विप्रास आपिरे । देवानाँ सुम्ने अमृतस्य चारुणो येन श्रवाँस्याशत ॥
yenā navagvo dadhyaṅṅaporṇute yena viprāsa āpire । devānām̐ sumne amṛtasya cāruṇo yena śravām̐syāśata ॥
सोमः पुनान ऊर्मिणाव्यं वारं वि धावति । अग्रे वाचः पवमानः कनिक्रदत् ॥
somaḥ punāna ūrmiṇāvyaṃ vāraṃ vi dhāvati । agre vācaḥ pavamānaḥ kanikradat ॥
धीभिर्मृजन्ति वाजिनं वने क्रीडन्तमत्यविम् । अभि त्रिपृष्ठं मतयः समस्वरन् ॥
dhībhirmṛjanti vājinaṃ vane krīḍantamatyavim । abhi tripṛṣṭhaṃ matayaḥ samasvaran ॥
असर्जि कलशाँ अभि मीढ्वान्त्सप्तिर्न वाजयुः । पुनानो वाचं जनयन्नसिष्यदत् ॥
asarji kalaśām̐ abhi mīḍhvāntsaptirna vājayuḥ । punāno vācaṃ janayannasiṣyadat ॥
सोमः पवते जनिता मतीनां जनिता दिवो जनिता पृथिव्याः । जनिताग्नेर्जनिता सूर्यस्य जनितेन्द्रस्य जनितोत विष्णोः ॥
somaḥ pavate janitā matīnāṃ janitā divo janitā pṛthivyāḥ । janitāgnerjanitā sūryasya janitendrasya janitota viṣṇoḥ ॥
ब्रह्मा देवानां पदवीः कवीनां ऋषिर्विप्राणां महिषोमृगाणाम् । श्येनो गृध्राणाँ स्वधितिर्वनानाँ सोमः पवित्रमत्येति रेभन् ॥
brahmā devānāṃ padavīḥ kavīnāṃ ṛṣirviprāṇāṃ mahiṣomṛgāṇām । śyeno gṛdhrāṇām̐ svadhitirvanānām̐ somaḥ pavitramatyeti rebhan ॥
प्रावीविपद्वाच ऊर्मिं न सिन्धुर्गिर स्तोमान्पवमानो मनीषाः । अन्तः पश्यन्वृजनेमावराण्या तिष्ठति वृषभो गोषु जानन् ॥
prāvīvipadvāca ūrmiṃ na sindhurgira stomānpavamāno manīṣāḥ । antaḥ paśyanvṛjanemāvarāṇyā tiṣṭhati vṛṣabho goṣu jānan ॥
