प्र त आश्विनीः पवमान धेनवो दिव्या असृग्रन्पयसा धरीमणि । प्रान्तरिक्षात्स्थाविरीस्ते असृक्षत ये त्वा मृजन्त्यृषिषाण वेधसः ॥
pra ta āśvinīḥ pavamāna dhenavo divyā asṛgranpayasā dharīmaṇi । prāntarikṣātsthāvirīste asṛkṣata ye tvā mṛjantyṛṣiṣāṇa vedhasaḥ ॥
उभयतः पवमानस्य रश्मयो ध्रुवस्य सतः परि यन्ति केतवः । यदी पवित्रे अधि मृज्यते हरिः सत्ता नि योनौ कलशेषु सीदति ॥
ubhayataḥ pavamānasya raśmayo dhruvasya sataḥ pari yanti ketavaḥ । yadī pavitre adhi mṛjyate hariḥ sattā ni yonau kalaśeṣu sīdati ॥
विश्वा धामानि विश्वचक्ष ऋभ्वसः प्रभोष्टे सतः परि यन्ति केतवः । व्यानशी पवसे सोम धर्मणा पतिर्विश्वस्य भुवनस्य राजसि ॥
viśvā dhāmāni viśvacakṣa ṛbhvasaḥ prabhoṣṭe sataḥ pari yanti ketavaḥ । vyānaśī pavase soma dharmaṇā patirviśvasya bhuvanasya rājasi ॥
पवमानो अजीजनद्दिवश्चित्रं न तन्यतुम् । ज्योतिर्वैश्वानरं बृहत् ॥
pavamāno ajījanaddivaścitraṃ na tanyatum । jyotirvaiśvānaraṃ bṛhat ॥
पवमान रसस्तव मदो राजन्नदुच्छुनः । वि वारमव्यमर्षति ॥
pavamāna rasastava mado rājannaducchunaḥ । vi vāramavyamarṣati ॥
पवमानस्य ते रसो दक्षो वि राजति द्युमान् । ज्योतिर्विश्वँ स्वर्दृशे ॥
pavamānasya te raso dakṣo vi rājati dyumān । jyotirviśvam̐ svardṛśe ॥
प्र यद्गावो न भूर्णयस्त्वेषा अयासो अक्रमुः । घ्नन्तः कृष्णामप त्वचम् ॥
pra yadgāvo na bhūrṇayastveṣā ayāso akramuḥ । ghnantaḥ kṛṣṇāmapa tvacam ॥
सुवितस्य मनामहेऽति सेतुं दुराय्यम् । साह्याम दस्युमव्रतम् ॥
suvitasya manāmahe'ti setuṃ durāyyam । sāhyāma dasyumavratam ॥
शृण्वे वृष्टेरिव स्वनः पवमानस्य शुष्मिणः । चरन्ति विद्युतो दिवि ॥
śaṛṇve vṛṣṭeriva svanaḥ pavamānasya śuṣmiṇaḥ । caranti vidyuto divi ॥
आ पवस्व महीमिषं गोमदिन्दो हिरण्यवत् । अश्ववत्सोम वीरवत् ॥
ā pavasva mahīmiṣaṃ gomadindo hiraṇyavat । aśvavatsoma vīravat ॥
पवस्व विश्वचर्षण आ मही रोदसी पृण । उषाः सूर्यो न रश्मिभिः ॥
pavasva viśvacarṣaṇa ā mahī rodasī pṛṇa । uṣāḥ sūryo na raśmibhiḥ ॥
परि नः शर्मयन्त्या धारया सोम विश्वतः । सरा रसेव विष्टपम् ॥
pari naḥ śarmayantyā dhārayā soma viśvataḥ । sarā raseva viṣṭapam ॥
आशुरर्ष बृहन्मते परि प्रियेण धाम्ना । यत्र देवा इति ब्रुवन् ॥
āśurarṣa bṛhanmate pari priyeṇa dhāmnā । yatra devā iti bruvan ॥
परिष्कृण्वन्ननिष्कृतं जनाय यातयन्निषः । वृष्टिं दिवः परि स्रव ॥
pariṣkṛṇvannaniṣkṛtaṃ janāya yātayanniṣaḥ । vṛṣṭiṃ divaḥ pari srava ॥
अयँ स यो दिवस्परि रघुयामा पवित्र आ । सिन्धोरूर्मा व्यक्षरत् ॥
ayam̐ sa yo divaspari raghuyāmā pavitra ā । sindhorūrmā vyakṣarat ॥
सुत एति पवित्र आ त्विषिं दधान ओजसा । विचक्षाणो विरोचयन् ॥
suta eti pavitra ā tviṣiṃ dadhāna ojasā । vicakṣāṇo virocayan ॥
आविवासन्परावतो अथो अर्वावतः सुतः । इन्द्राय सिच्यते मधु ॥
āvivāsanparāvato atho arvāvataḥ sutaḥ । indrāya sicyate madhu ॥
समीचीना अनूषत हरिँ हिन्वन्त्यद्रिभिः । इन्दुमिन्द्राय पीतये ॥
samīcīnā anūṣata harim̐ hinvantyadribhiḥ । indumindrāya pītaye ॥
हिन्वन्ति सूरमुस्रयः स्वसारो जामयस्पतिम् । महामिन्दुं महीयुवः ॥
hinvanti sūramusrayaḥ svasāro jāmayaspatim । mahāminduṃ mahīyuvaḥ ॥
पवमान रुचारुचा देवो देवेभ्यः सुतः । विश्वा वसून्या विश ॥
pavamāna rucārucā devo devebhyaḥ sutaḥ । viśvā vasūnyā viśa ॥
आ पवमान सुष्टुतिं वृष्टिं देवेभ्यो दुवः । इषे पवस्व संयतम् ॥
ā pavamāna suṣṭutiṃ vṛṣṭiṃ devebhyo duvaḥ । iṣe pavasva saṃyatam ॥
जनस्य गोपा अजनिष्ट जागृविरग्निः सुदक्षः सुविताय नव्यसे । घृतप्रतीको बृहता दिविस्पृषा द्युमद्वि भाति भरतेभ्यः शुचिः ॥
janasya gopā ajaniṣṭa jāgṛviragniḥ sudakṣaḥ suvitāya navyase । ghṛtapratīko bṛhatā divispṛṣā dyumadvi bhāti bharatebhyaḥ śuciḥ ॥
त्वामग्ने अङ्गिरसो गुहा हितमन्वविन्दञ्छिश्रियाणं वनेवने । स जायसे मथ्यमानः सहो महत्वामाहुः सहसस्पुत्रमङ्गिरः ॥
tvāmagne aṅgiraso guhā hitamanvavindañchiśriyāṇaṃ vanevane । sa jāyase mathyamānaḥ saho mahatvāmāhuḥ sahasasputramaṅgiraḥ ॥
यज्ञस्य केतुं प्रथमं पुरोहितमग्निं नरस्त्रिषधस्थे समिन्धते । इन्द्रेण देवैः सरथँ स बर्हिषि सीदन्नि होता यजथाय सुक्रतुः ॥
yajñasya ketuṃ prathamaṃ purohitamagniṃ narastriṣadhasthe samindhate । indreṇa devaiḥ saratham̐ sa barhiṣi sīdanni hotā yajathāya sukratuḥ ॥
अयं वां मित्रावरुणा सुतः सोम ऋतावृधा । ममेदिह श्रुतँ हवम् ॥
ayaṃ vāṃ mitrāvaruṇā sutaḥ soma ṛtāvṛdhā । mamediha śrutam̐ havam ॥
राजानावनभिद्रुहा ध्रुवे सदस्युत्तमे । सहस्रस्थूण आशाते ॥
rājānāvanabhidruhā dhruve sadasyuttame । sahasrasthūṇa āśāte ॥
ता सम्राजा घृतासुती आदित्या दानुनस्पती । सचेते अनवह्वरम् ॥
tā samrājā ghṛtāsutī ādityā dānunaspatī । sacete anavahvaram ॥
इन्द्रो दधीचो अस्थभिर्वृत्राण्यप्रतिष्कुतः । जघान नवतीर्नव ॥
indro dadhīco asthabhirvṛtrāṇyapratiṣkutaḥ । jaghāna navatīrnava ॥
इच्छन्नश्वस्य यच्छिरः पर्वतेष्वपश्रितम् । तद्विदच्छर्यणावति ॥
icchannaśvasya yacchiraḥ parvateṣvapaśritam । tadvidaccharyaṇāvati ॥
अत्राह गोरमन्वत नाम त्वष्टुरपीच्यम् । इत्था चन्द्रमसो गृहे ॥
atrāha goramanvata nāma tvaṣṭurapīcyam । itthā candramaso gṛhe ॥
