पवस्व वाचो अग्रियः सोम चित्राभिरूतिभिः । अभि विश्वानि काव्या ॥
pavasva vāco agriyaḥ soma citrābhirūtibhiḥ । abhi viśvāni kāvyā ॥
त्वँ समुद्रिया अपोऽग्रियो वाच ईरयन् । पवस्व विश्वचर्षणे ॥
tvam̐ samudriyā apo'griyo vāca īrayan । pavasva viśvacarṣaṇe ॥
तुभ्येमा भुवना कवे महिम्ने सोम तस्थिरे । तुभ्यं धावन्ति धेनवः ॥
tubhyemā bhuvanā kave mahimne soma tasthire । tubhyaṃ dhāvanti dhenavaḥ ॥
पवस्वेन्दो वृषा सुतः कृधी नो यशसो जने । विश्वा अप द्विषो जहि ॥
pavasvendo vṛṣā sutaḥ kṛdhī no yaśaso jane । viśvā apa dviṣo jahi ॥
यस्य ते सख्ये वयँ सासह्याम पृतन्यतः । तवेन्दो द्युम्न उत्तमे ॥
yasya te sakhye vayam̐ sāsahyāma pṛtanyataḥ । tavendo dyumna uttame ॥
या ते भीमान्यायुधा तिग्मानि सन्ति धूर्वणे । रक्षा समस्य नो निदः ॥
yā te bhīmānyāyudhā tigmāni santi dhūrvaṇe । rakṣā samasya no nidaḥ ॥
वृषा सोम द्युमाँ असि वृषा देव वृषव्रतः । वृषा धर्माणि दध्रिषे ॥
vṛṣā soma dyumām̐ asi vṛṣā deva vṛṣavrataḥ । vṛṣā dharmāṇi dadhriṣe ॥
वृष्णस्ते वृष्ण्यँ शवो वृषा वनं वृषा सुतः । स त्वं वृषन्वृषेदसि ॥
vṛṣṇaste vṛṣṇyam̐ śavo vṛṣā vanaṃ vṛṣā sutaḥ । sa tvaṃ vṛṣanvṛṣedasi ॥
अश्वो न चक्रदो वृषा सं गा इन्दो समर्वतः । वि नो राये दुरो वृधि ॥
aśvo na cakrado vṛṣā saṃ gā indo samarvataḥ । vi no rāye duro vṛdhi ॥
वृषा ह्यसि भानुना द्युमन्तं त्वा हवामहे । पवमान स्वर्दृशम् ॥
vṛṣā hyasi bhānunā dyumantaṃ tvā havāmahe । pavamāna svardṛśam ॥
यदद्भिः परिशिच्यसे मर्मृज्यमान आयुभिः । द्रोणे सधस्थमश्नुषे ॥
yadadbhiḥ pariśicyase marmṛjyamāna āyubhiḥ । droṇe sadhasthamaśnuṣe ॥
आ पवस्व सुवीर्यं मन्दमानः स्वायुध । इहो ष्विन्दवा गहि ॥
ā pavasva suvīryaṃ mandamānaḥ svāyudha । iho ṣvindavā gahi ॥
पवमानस्य ते वयं पवित्रमभ्युन्दतः । सखित्वमा वृणीमहे ॥
pavamānasya te vayaṃ pavitramabhyundataḥ । sakhitvamā vṛṇīmahe ॥
ये ते पवित्रमूर्मयोऽभिक्षरन्ति धारया । तेभिर्नः सोम मृडय ॥
ye te pavitramūrmayo'bhikṣaranti dhārayā । tebhirnaḥ soma mṛḍaya ॥
स नः पुनान आ भर रयिं वीरवतीमिषम् ईशानः सोम विश्वतः ॥
sa naḥ punāna ā bhara rayiṃ vīravatīmiṣam īśānaḥ soma viśvataḥ ॥
अग्निं दूतं वृणीमहे होतारं विश्ववेदसम् । अस्य यज्ञस्य सुक्रतुम् ॥
agniṃ dūtaṃ vṛṇīmahe hotāraṃ viśvavedasam । asya yajñasya sukratum ॥
अग्निमग्निँ हवीमभिः सदा हवन्त विश्पतिम् । हव्यवाहं पुरुप्रियम् ॥
agnimagnim̐ havīmabhiḥ sadā havanta viśpatim । havyavāhaṃ purupriyam ॥
अग्ने देवाँ इहा वह जज्ञानो वृक्तबर्हिषे । असि होता न ईड्यः ॥
agne devām̐ ihā vaha jajñāno vṛktabarhiṣe । asi hotā na īḍyaḥ ॥
मित्रं वयँ हवामहे वरुणँ सोमपीतये । य जाता पूतदक्षसा ॥
mitraṃ vayam̐ havāmahe varuṇam̐ somapītaye । ya jātā pūtadakṣasā ॥
ऋतेन यावृतावृधावृतस्य ज्योतिषस्पती । ता मित्रावरुणा हुवे ॥
ṛtena yāvṛtāvṛdhāvṛtasya jyotiṣaspatī । tā mitrāvaruṇā huve ॥
वरुणः प्राविता भुवन्मित्रो विश्वाभिरूतिभिः । करतां नः सुराधसः ॥
varuṇaḥ prāvitā bhuvanmitro viśvābhirūtibhiḥ । karatāṃ naḥ surādhasaḥ ॥
इन्द्रमिद्गाथिनो बृहदिन्द्रमर्केभिरर्किणः । इन्द्रं वाणीरनूषत ॥
indramidgāthino bṛhadindramarkebhirarkiṇaḥ । indraṃ vāṇīranūṣata ॥
इन्द्र इद्धर्योः सचा सम्मिश्ल आ वचोयुजा । इन्द्रो वज्री हिरण्ययः ॥
indra iddharyoḥ sacā sammiśla ā vacoyujā । indro vajrī hiraṇyayaḥ ॥
इन्द्र वाजेषु नोऽव सहस्रप्रधनेषु च । उग्र उग्राभिरूतिभिः ॥
indra vājeṣu no'va sahasrapradhaneṣu ca । ugra ugrābhirūtibhiḥ ॥
इन्द्रो दीर्घाय चक्षस आ सूर्यँ रोहयद्दिवि । वि गोभिरद्रिमैरयत् ॥
indro dīrghāya cakṣasa ā sūryam̐ rohayaddivi । vi gobhiradrimairayat ॥
इन्द्रे अग्ना नमो बृहत्सुवृक्तिमेरयामहे । धिया धेना अवस्यवः ॥
indre agnā namo bṛhatsuvṛktimerayāmahe । dhiyā dhenā avasyavaḥ ॥
ता हि शश्वन्त ईडत इत्था विप्रास ऊतये । सबाधो वाजसातये ॥
tā hi śaśvanta īḍata itthā viprāsa ūtaye । sabādho vājasātaye ॥
ता वां गीर्भिर्विपन्युवः प्रयस्वन्तो हवामहे । मेधसाता सनिष्यवः ॥
tā vāṃ gīrbhirvipanyuvaḥ prayasvanto havāmahe । medhasātā saniṣyavaḥ ॥
वृषा पवस्व धारया मरुत्वते च मत्सरः । दिश्वा दधान ओजसा ॥
vṛṣā pavasva dhārayā marutvate ca matsaraḥ । diśvā dadhāna ojasā ॥
तं त्वा धर्त्तारमोण्यो३ः पवमान स्वर्दृशम् । हिन्वे वाजेषु वाजिनम् ॥
taṃ tvā dharttāramoṇyo३ḥ pavamāna svardṛśam । hinve vājeṣu vājinam ॥
