वयमु त्वा तदिदर्था इन्द्र त्वायन्तः सखायः । कण्वा उक्थेभिर्जरन्ते ॥
vayamu tvā tadidarthā indra tvāyantaḥ sakhāyaḥ । kaṇvā ukthebhirjarante ॥
इन्द्राय मद्वने सुतं परि ष्टोभन्तु नो गिरः । अर्कमर्चन्तु कारवः ॥
indrāya madvane sutaṃ pari ṣṭobhantu no giraḥ । arkamarcantu kāravaḥ ॥
अयं त इन्द्र सोमो निपूतो अधि बर्हिषि । एहीमस्य द्रवा पिब ॥
ayaṃ ta indra somo nipūto adhi barhiṣi । ehīmasya dravā piba ॥
सुरूपकृत्नुमूतये सुदुघामिव गोदुहे । जुहूमसि द्यविद्यवि ॥
surūpakṛtnumūtaye sudughāmiva goduhe । juhūmasi dyavidyavi ॥
अभि त्वा वृषभा सुते सुतँ सृजामि पीतये । तृम्पा व्यश्नुही मदम् ॥
abhi tvā vṛṣabhā sute sutam̐ sṛjāmi pītaye । tṛmpā vyaśnuhī madam ॥
य इन्द्र चमसेष्वा सोमश्चमूषु ते सुतः । पिबेदस्य त्वमीशिषे ॥
ya indra camaseṣvā somaścamūṣu te sutaḥ । pibedasya tvamīśiṣe ॥
योगेयोगे तवस्तरं वाजेवाजे हवामहे । सखाय इन्द्रमूतये ॥
yogeyoge tavastaraṃ vājevāje havāmahe । sakhāya indramūtaye ॥
आ त्वेता नि षीदतेन्द्रमभि प्र गायत । सखायः स्तोमवाहसः ॥
ā tvetā ni ṣīdatendramabhi pra gāyata । sakhāyaḥ stomavāhasaḥ ॥
इदँ ह्यन्वोजसा सुतँ राधानां पते । पिबा त्वा३स्य गिर्वणः ॥
idam̐ hyanvojasā sutam̐ rādhānāṃ pate । pibā tvā३sya girvaṇaḥ ॥
महाँ इन्द्रः पुरश्च नो महित्वमस्तु वज्रिणे । द्यौर्न प्रथिना शवः ॥
mahām̐ indraḥ puraśca no mahitvamastu vajriṇe । dyaurna prathinā śavaḥ ॥
आ तू न इन्द्र क्षुमन्तं चित्रं ग्राभँ सं गृभाय । महाहस्ती दक्षिणेन ॥
ā tū na indra kṣumantaṃ citraṃ grābham̐ saṃ gṛbhāya । mahāhastī dakṣiṇena ॥
अभि प्र गोपतिं गिरेन्द्रमर्च यथा विदे । सूनुँ सत्यस्य सत्पतिम् ॥
abhi pra gopatiṃ girendramarca yathā vide । sūnum̐ satyasya satpatim ॥
कया नश्चित्र आ भुवदूती सदावृधः सखा । कया शचिष्ठया वृता ॥
kayā naścitra ā bhuvadūtī sadāvṛdhaḥ sakhā । kayā śaciṣṭhayā vṛtā ॥
त्यमु वः सत्रासाहं विश्वासु गीर्ष्वायतम् । आ च्यावयस्यूतये ॥
tyamu vaḥ satrāsāhaṃ viśvāsu gīrṣvāyatam । ā cyāvayasyūtaye ॥
सदसस्पतिमद्भुतं प्रियमिन्द्रस्य काम्यम् । सनिं मेधामयासिषम् ॥
sadasaspatimadbhutaṃ priyamindrasya kāmyam । saniṃ medhāmayāsiṣam ॥
ये ते पन्था अधो दिवो येभिर्व्यश्वमैरयः । उत श्रोषन्तु नो भुवः ॥
ye te panthā adho divo yebhirvyaśvamairayaḥ । uta śroṣantu no bhuvaḥ ॥
भद्रम्भद्रं न आ भरेषमूर्जँ शतक्रतो । यदिन्द्र मृडयासि नः ॥
bhadrambhadraṃ na ā bhareṣamūrjam̐ śatakrato । yadindra mṛḍayāsi naḥ ॥
अस्ति सोमो अयँ सुतः पिबन्त्यस्य मरुतः । उत स्वराजो अश्विना ॥
asti somo ayam̐ sutaḥ pibantyasya marutaḥ । uta svarājo aśvinā ॥
ईङ्खयन्तीरपस्युव इन्द्रं जातमुपासते । वन्वानासः सुवीर्यम् ॥
īṅkhayantīrapasyuva indraṃ jātamupāsate । vanvānāsaḥ suvīryam ॥
न कि देवा इनीमसि न क्या योपयामसि । मन्त्रश्रुत्यं चरामसि ॥
na ki devā inīmasi na kyā yopayāmasi । mantraśrutyaṃ carāmasi ॥
दोषो आगाद्बृहद्गाय द्युमद्गामन्नाथर्वण । स्तुहि देवँ सवितारम् ॥
doṣo āgādbṛhadgāya dyumadgāmannātharvaṇa । stuhi devam̐ savitāram ॥
एषो उषा अपूर्व्या व्युच्छति प्रिया दिवः । स्तुषे वामश्विना बृहत् ॥
eṣo uṣā apūrvyā vyucchati priyā divaḥ । stuṣe vāmaśvinā bṛhat ॥
इन्द्रो दधीचो अस्थभिर्वृत्राण्यप्रतिष्कुतः । जघान नवतीर्नव ॥
indro dadhīco asthabhirvṛtrāṇyapratiṣkutaḥ । jaghāna navatīrnava ॥
इन्द्रेहि मत्स्यन्धसो विश्वेभिः सोमपर्वभिः । महाँ अभिष्टिरोजसा ॥
indrehi matsyandhaso viśvebhiḥ somaparvabhiḥ । mahām̐ abhiṣṭirojasā ॥
आ तू न इन्द्र वृत्रहन्नस्माकमर्धमा गहि । महान्महीभिरूतिभिः ॥
ā tū na indra vṛtrahannasmākamardhamā gahi । mahānmahībhirūtibhiḥ ॥
ओजस्तदस्य तित्विष उभे यत्समवर्तयत् । इन्द्रश्चर्मेव रोदसी ॥
ojastadasya titviṣa ubhe yatsamavartayat । indraścarmeva rodasī ॥
अयमु ते समतसि कपोत इव गर्भधिम् । वचस्तच्चिन्न ओहसे ॥
ayamu te samatasi kapota iva garbhadhim । vacastaccinna ohase ॥
वात आ वातु बेषजँ शम्भु मयोभु नो हृदे । प्र न अयूँषि तारिषत् ॥
vāta ā vātu beṣajam̐ śambhu mayobhu no hṛde । pra na ayūm̐ṣi tāriṣat ॥
यँ रक्षन्ति प्रचेतसो वरुणो मित्रो अर्यमा । न किः स दभ्यते जनः ॥
yam̐ rakṣanti pracetaso varuṇo mitro aryamā । na kiḥ sa dabhyate janaḥ ॥
गव्यो षु णो यथा पुराश्वयोत रथया । वरिवस्या महोनाम् ॥
gavyo ṣu ṇo yathā purāśvayota rathayā । varivasyā mahonām ॥
