Kāṇḍa 19 Sūkta 52

AV 19.52.1

Cite Detail

कामः।
१-५ ब्रह्माः कामः। त्रिष्टुप्, ३ चतुष्पदा उष्णिक्, ५ उपरिष्टाद्बृहती।
काम॒स्तदग्रे॒ सम॑वर्तत॒ मन॑सो॒ रेतः॑ प्रथ॒मं यदासी॑त्।
स का॑म॒ कामे॑न बृह॒ता सयो॑नी रा॒यस्पोषं॒ यज॑मानाय धेहि

AV 19.52.2

Cite Detail

त्वं का॑म॒ सह॑सासि॒ प्रति॑ष्ठितो वि॒भुर्वि॒भावा॑ सख॒ आ स॑खीय॒ते।
त्वमु॒ग्रः पृत॑नासु सास॒हिः सह॒ ओजो॒ यज॑मानाय धेहि

AV 19.52.3

Cite Detail

दू॒राच्च॑कमा॒नाय॑ प्रतिपा॒णायाक्ष॑ये ।
आस्मा॑ अशृण्व॒न्नाशाः॒ कामे॑नाजनय॒न्त्स्वः

AV 19.52.4

Cite Detail

कामे॑न मा॒ काम॒ आगन् हृद॑या॒द्धृद॑यं॒ परि॑ ।
यद॒मीषा॑म॒दो मन॒स्तदैतूप॒ मामि॒ह

AV 19.52.5

Cite Detail

यत् का॑म का॒मय॑माना इ॒दं कृ॒ण्मसि॑ ते ह॒विः ।
तन्नः॒ सर्वं॒ समृ॑ध्यता॒मथै॒तस्य॑ ह॒विषो॑ वीहि॒ स्वाहा॑

← Previous (Ch. 572) Full Table of Contents Next (Ch. 574) →