Kāṇḍa 19 Sūkta 50

AV 19.50.1

Cite Detail

रात्रिः।
१-७ गोपथः। रात्रिः। अनुष्टुप्।
अध॑ रात्रि तृ॒ष्टधू॑ममशी॒र्षाण॒महिं॑ कृणु ।
अ॒क्षौ वृक॑स्य॒ निर्ज॑ह्या॒स्तेन॒ तं द्रु॑प॒दे ज॑हि

AV 19.50.2

Cite Detail

ये ते॑ रात्र्यन॒ड्वाह॒स्तीक्ष्ण॑शृङ्गाः स्वा॒शवः॑ ।
तेभि॑र्नो अ॒द्य पा॑र॒याति॑ दु॒र्गाणि॑ वि॒श्वहा॑

AV 19.50.3

Cite Detail

रात्रिं॑रात्रि॒मरि॑ष्यन्त॒स्तरे॑म त॒न्वा व॒यम्।
ग॒म्भी॒रमप्ल॑वा इव॒ न त॑रेयु॒ररा॑तयः

AV 19.50.4

Cite Detail

यथा॑ शा॒म्याकः॑ प्र॒पत॑न्नप॒वान् नानु॑वि॒द्यते॑ ।
ए॒वा रा॑त्रि॒ प्र पा॑तय॒ यो अ॒स्मां अ॑भ्यघा॒यति

AV 19.50.5

Cite Detail

अप॑ स्ते॒नं वासो॑ गोअ॒जमु॒त तस्क॑रम्।
अथो॒ यो अर्व॑तः॒ शिरो॑ऽभि॒धाय॒ निनी॑षति

AV 19.50.6

Cite Detail

यद॒द्या रा॑त्रि सुभगे वि॒भज॒न्त्ययो॒ वसु॑ ।
यदे॒तद॒स्मान् भो॑जय॒ यथेद॒न्यानु॒पाय॑सि

AV 19.50.7

Cite Detail

उ॒षसे॑ नः॒ परि॑ देहि॒ सर्वा॒न् रात्र्य॑ना॒गसः॑ ।
उ॒षा नो॒ अह्ने॒ आ भ॑जा॒दह॒स्तुभ्यं॑ विभावरि

← Previous (Ch. 570) Full Table of Contents Next (Ch. 572) →