एते सोमा असृक्षत गृणानाः शवसे महे । मदिन्तमस्य धारया ॥
ete somā asṛkṣata gṛṇānāḥ śavase mahe । madintamasya dhārayā ॥
अभि गव्यानि वीतये नृम्णा पुनानो अर्षसि । सनद्वाजः परि स्रव ॥
abhi gavyāni vītaye nṛmṇā punāno arṣasi । sanadvājaḥ pari srava ॥
उत नो गोमतीरिषो विश्वा अर्ष परिष्टुभः । गृणानो जमदग्निना ॥
uta no gomatīriṣo viśvā arṣa pariṣṭubhaḥ । gṛṇāno jamadagninā ॥
इमँ स्तोममर्हते जातवेदसे रथमिव सं महेमा मनीषया । भद्रा हि नः प्रमतिरस्य सँसद्यग्ने सख्ये मा रिषामा वयं तव ॥
imam̐ stomamarhate jātavedase rathamiva saṃ mahemā manīṣayā । bhadrā hi naḥ pramatirasya sam̐sadyagne sakhye mā riṣāmā vayaṃ tava ॥
भरामेध्मं कृणवामा हवीँषि ते चितयन्तः पर्वणापर्वणा वयम् । जीवातवे प्रतरँ साधया धियोऽग्ने सख्ये म रिषामा वयं तव ॥
bharāmedhmaṃ kṛṇavāmā havīm̐ṣi te citayantaḥ parvaṇāparvaṇā vayam । jīvātave prataram̐ sādhayā dhiyo'gne sakhye ma riṣāmā vayaṃ tava ॥
शकेम त्वा समिधँ साधया धियस्त्वे देवा हविरदन्त्याहुतम् । त्वमादित्याँ आ वह तान्ह्यू३श्मस्यग्ने सख्ये मा रिषामा वयं तव ॥
śakema tvā samidham̐ sādhayā dhiyastve devā haviradantyāhutam । tvamādityām̐ ā vaha tānhyū३śmasyagne sakhye mā riṣāmā vayaṃ tava ॥
प्रति वाँ सूर उदिते मित्रं गृणीषे वरुणम् । अर्यमणँ रिशादसम् ॥
prati vām̐ sūra udite mitraṃ gṛṇīṣe varuṇam । aryamaṇam̐ riśādasam ॥
राया हिरण्यया मतिरियमवृकाय शवसे । इयं विप्रामेधसातये ॥
rāyā hiraṇyayā matiriyamavṛkāya śavase । iyaṃ viprāmedhasātaye ॥
ते स्याम देव वरुण ते मित्र सूरिभिः सह । इषँ स्वश्च धीमहि ॥
te syāma deva varuṇa te mitra sūribhiḥ saha । iṣam̐ svaśca dhīmahi ॥
भिन्धि विश्वा अप द्विषः परि बाधो जही मृधः । वसु स्पार्हं तदा भर ॥
bhindhi viśvā apa dviṣaḥ pari bādho jahī mṛdhaḥ । vasu spārhaṃ tadā bhara ॥
यस्य ते विश्वमानुषग्भूरेर्दत्तस्य वेदति । वसु स्पार्हं तदा भर ॥
yasya te viśvamānuṣagbhūrerdattasya vedati । vasu spārhaṃ tadā bhara ॥
यद्वीडाविन्द्र यत्स्थिरे यत्पर्शाने पराभृतम् । वसु स्पार्हं तदा भर ॥
yadvīḍāvindra yatsthire yatparśāne parābhṛtam । vasu spārhaṃ tadā bhara ॥
यज्ञस्य हि स्थ ऋत्विजा सस्नी वाजेषु कर्मसु । इन्द्राग्नी तस्य बोधतम् ॥
yajñasya hi stha ṛtvijā sasnī vājeṣu karmasu । indrāgnī tasya bodhatam ॥
तोशासा रथयावाना वृत्रहणापराजिता । इन्द्राग्नी तस्य बोधतम् ॥
tośāsā rathayāvānā vṛtrahaṇāparājitā । indrāgnī tasya bodhatam ॥
इदं वां मदिरं मध्वधुक्षन्नद्रिभिर्नरः । इन्द्राग्नी तस्य बोधतम् ॥
idaṃ vāṃ madiraṃ madhvadhukṣannadribhirnaraḥ । indrāgnī tasya bodhatam ॥
इन्द्रायेन्दो मरुत्वते पवस्व मधुमत्तमः । अर्कस्य योनिमासदम् ॥
indrāyendo marutvate pavasva madhumattamaḥ । arkasya yonimāsadam ॥
तं त्वा विप्रा वचोविदः परिष्कृण्वन्ति धर्णसिम् । सं त्वा मृजन्त्यायवः ॥
taṃ tvā viprā vacovidaḥ pariṣkṛṇvanti dharṇasim । saṃ tvā mṛjantyāyavaḥ ॥
रसं ते मित्रो अर्यमा पिबन्तु वरुणः कवे । पवमानस्य मरुतः ॥
rasaṃ te mitro aryamā pibantu varuṇaḥ kave । pavamānasya marutaḥ ॥
मृज्यमानः सुहस्त्य समुद्रे वाचमिन्वसि । रयिं पिशङ्गं बहुलं पुरुस्पृहं पवमानाभ्यर्षसि ॥
mṛjyamānaḥ suhastya samudre vācaminvasi । rayiṃ piśaṅgaṃ bahulaṃ puruspṛhaṃ pavamānābhyarṣasi ॥
पुनानो वरे पवमनो अव्यये वृषो अचिक्रदद्वने । देवानाँ सोम पवमान निष्कृतं गोभिरञ्जानो अर्षसि ॥
punāno vare pavamano avyaye vṛṣo acikradadvane । devānām̐ soma pavamāna niṣkṛtaṃ gobhirañjāno arṣasi ॥
एतमु त्यं दश क्षिपो मृजन्ति सिन्धुमातरम् । समादित्येभिरख्यत ॥
etamu tyaṃ daśa kṣipo mṛjanti sindhumātaram । samādityebhirakhyata ॥
समिन्द्रेणोत वायुना सुत एति पवित्र आ । सँ सूर्यस्य रश्मिभिः ॥
samindreṇota vāyunā suta eti pavitra ā । sam̐ sūryasya raśmibhiḥ ॥
स नो भगाय वायवे पूष्णे पवस्व मधुमान् । चारुर्मित्रे वरुणे च ॥
sa no bhagāya vāyave pūṣṇe pavasva madhumān । cārurmitre varuṇe ca ॥
रेवतीर्नः सधमाद इन्द्रे सन्तु तुविवाजाः । क्षुमन्तो याभिर्मदेम ॥
revatīrnaḥ sadhamāda indre santu tuvivājāḥ । kṣumanto yābhirmadema ॥
आ घ त्वावां त्मना युक्तः स्तोतृभ्यो धृष्णवीयानः । ऋणोरक्षं न चक्र्योः ॥
ā gha tvāvāṃ tmanā yuktaḥ stotṛbhyo dhṛṣṇavīyānaḥ । ṛṇorakṣaṃ na cakryoḥ ॥
आ यद्दुवः शतक्रतवा कामं जरितॄणाम् । ऋणोरक्षं न शचीभिः ॥
ā yadduvaḥ śatakratavā kāmaṃ jaritṝṇām । ṛṇorakṣaṃ na śacībhiḥ ॥
सुरूपकृत्नुमूतये सुदुघामिव गोदुहे । जुहूमसि द्यविद्यवि ॥
surūpakṛtnumūtaye sudughāmiva goduhe । juhūmasi dyavidyavi ॥
उप नः सवना गहि सोमस्य सोमपाः पिब । गोदा इद्रेवतो मदः ॥
upa naḥ savanā gahi somasya somapāḥ piba । godā idrevato madaḥ ॥
अथा ते अन्तमानां विद्याम सुमतीनाम् । मा नो अति ख्य आ गहि ॥
athā te antamānāṃ vidyāma sumatīnām । mā no ati khya ā gahi ॥
उभे यदिन्द्र रोदसी आपप्राथोषा इव । महान्तं त्वा महीनाँ सम्राजं चर्षणीनाम् । देवी जनित्र्यजीजनद्भद्रा जनित्र्यजीजनत् ॥
ubhe yadindra rodasī āpaprāthoṣā iva । mahāntaṃ tvā mahīnām̐ samrājaṃ carṣaṇīnām । devī janitryajījanadbhadrā janitryajījanat ॥
