ज्योतिर्यज्ञस्य पवते मधु प्रियं पिता देवानां जनिता विभूवसुः । दधाति रत्नँ स्वधयोरपीच्यं मदिन्तमो मत्सर इन्द्रियो रसः ॥
jyotiryajñasya pavate madhu priyaṃ pitā devānāṃ janitā vibhūvasuḥ । dadhāti ratnam̐ svadhayorapīcyaṃ madintamo matsara indriyo rasaḥ ॥
अभिक्रन्दन्कलशं वाज्यर्षति पतिर्दिवः शतधारो विचक्षणः । हरिर्मित्रस्य सदनेषु सीदति मर्मृजानोऽविभिः सिन्धुभिर्वृषा ॥
abhikrandankalaśaṃ vājyarṣati patirdivaḥ śatadhāro vicakṣaṇaḥ । harirmitrasya sadaneṣu sīdati marmṛjāno'vibhiḥ sindhubhirvṛṣā ॥
अग्रे सिन्धूनां पवमानो अर्षत्यग्रे वाचो अग्रियो गोषु गच्छसि । अग्रे वाजस्य भजसे महद्धनँ स्वायुधः सोतृभिः सोम सूयसे ॥
agre sindhūnāṃ pavamāno arṣatyagre vāco agriyo goṣu gacchasi । agre vājasya bhajase mahaddhanam̐ svāyudhaḥ sotṛbhiḥ soma sūyase ॥
असृक्षत प्र वाजिनो गव्या सोमासो अश्वया । शुक्रासो वीरयाशवः ॥
asṛkṣata pra vājino gavyā somāso aśvayā । śukrāso vīrayāśavaḥ ॥
शुम्भमानो ऋतायुभिर्मृज्यमाना गभस्त्योः । पवन्ते वारे अव्यये ॥
śumbhamāno ṛtāyubhirmṛjyamānā gabhastyoḥ । pavante vāre avyaye ॥
ते विश्वा दाशुषे वसु सोमा दिव्यानि पार्थिवा । पवन्तामान्तरिक्ष्या ॥
te viśvā dāśuṣe vasu somā divyāni pārthivā । pavantāmāntarikṣyā ॥
पवस्व देववीरति पवित्रँ सोम रँह्या । इन्द्रमिन्दो वृषा विश ॥
pavasva devavīrati pavitram̐ soma ram̐hyā । indramindo vṛṣā viśa ॥
आ वच्यस्व महि प्सरो वृषेन्दो द्युम्नवत्तमः । आ योनिं धर्णसिः सदः ॥
ā vacyasva mahi psaro vṛṣendo dyumnavattamaḥ । ā yoniṃ dharṇasiḥ sadaḥ ॥
अधुक्षत प्रियं मधु धारा सुतस्य वेधसः । अपो वसिष्ट सुक्रतुः ॥
adhukṣata priyaṃ madhu dhārā sutasya vedhasaḥ । apo vasiṣṭa sukratuḥ ॥
महान्तं त्वा महीरन्वापो अर्षन्ति सिन्धवः । यद्गोभिर्वासयिष्यसे ॥
mahāntaṃ tvā mahīranvāpo arṣanti sindhavaḥ । yadgobhirvāsayiṣyase ॥
समुद्रो अप्सु मामृजे विष्टम्भो धरुणो दिवः । सोमः पवित्रे अस्मयुः ॥
samudro apsu māmṛje viṣṭambho dharuṇo divaḥ । somaḥ pavitre asmayuḥ ॥
अचिक्रदद्वृषा हरिर्महान्मित्रो न दर्शतः । सँ सूर्येण दिद्युते ॥
acikradadvṛṣā harirmahānmitro na darśataḥ । sam̐ sūryeṇa didyute ॥
गिरस्त इन्द ओजसा मर्मृज्यन्ते अपस्युवः । याभिर्मदाय शुम्भसे ॥
girasta inda ojasā marmṛjyante apasyuvaḥ । yābhirmadāya śumbhase ॥
तं त्वा मदाय घृष्वय उ लोककृत्नुमीमहे । तव प्रशस्तये महे ॥
taṃ tvā madāya ghṛṣvaya u lokakṛtnumīmahe । tava praśastaye mahe ॥
गोषा इन्दो नृषा अस्यश्वसा वाजसा उत । आत्मा यज्ञस्य पूर्व्यः ॥
goṣā indo nṛṣā asyaśvasā vājasā uta । ātmā yajñasya pūrvyaḥ ॥
अस्मभ्यमिन्दविन्द्रियं मधोः पवस्व धारया । पर्जन्यो वृष्टिमाँ इव ॥
asmabhyamindavindriyaṃ madhoḥ pavasva dhārayā । parjanyo vṛṣṭimām̐ iva ॥
सना च सोम जेषि च पवमान महि श्रवः । अथा नो वस्यसस्कृधि ॥
sanā ca soma jeṣi ca pavamāna mahi śravaḥ । athā no vasyasaskṛdhi ॥
सना ज्योतिः सना स्वा३र्विश्वा च सोम सौभगा । अथा नो वस्यसस्कृधि ॥
sanā jyotiḥ sanā svā३rviśvā ca soma saubhagā । athā no vasyasaskṛdhi ॥
सना दक्षमुत क्रतुमप सोम मृधो जहि । अथा नो वस्यसस्कृधि ॥
sanā dakṣamuta kratumapa soma mṛdho jahi । athā no vasyasaskṛdhi ॥
पवीतारः पुनीतन सोममिन्द्राय पातवे । अथा नो वस्यसस्कृधि ॥
pavītāraḥ punītana somamindrāya pātave । athā no vasyasaskṛdhi ॥
त्वँ सूर्ये न आ भज तव क्रत्वा तवोतिभिः । अथा नो वस्यसस्कृधि ॥
tvam̐ sūrye na ā bhaja tava kratvā tavotibhiḥ । athā no vasyasaskṛdhi ॥
तव क्रत्वा तवोतिभिर्ज्योक्पश्येम सूर्यम् । अथा नो वस्यसस्कृधि ॥
tava kratvā tavotibhirjyokpaśyema sūryam । athā no vasyasaskṛdhi ॥
अभ्यर्ष स्वायुध सोम द्विबर्हसँ रयिम् । अथा नो वस्यसस्कृधि ॥
abhyarṣa svāyudha soma dvibarhasam̐ rayim । athā no vasyasaskṛdhi ॥
अभ्या३र्षानपच्युतो वाजिन्त्समत्सु सासहिः । अथा नो वस्यसस्कृधि ॥
abhyā३rṣānapacyuto vājintsamatsu sāsahiḥ । athā no vasyasaskṛdhi ॥
त्वां यज्ञैरवीवृधन्पवमान विधर्मणि । अथा नो वस्यसस्कृधि ॥
tvāṃ yajñairavīvṛdhanpavamāna vidharmaṇi । athā no vasyasaskṛdhi ॥
रयिं नश्चित्रमश्विनमिन्दो विश्वायुमा भर । अथा नो वस्यसस्कृधि ॥
rayiṃ naścitramaśvinamindo viśvāyumā bhara । athā no vasyasaskṛdhi ॥
तरत्स मन्दी धावति धारा सुतस्यान्धसः । तरत्स मन्दी धावति ॥
taratsa mandī dhāvati dhārā sutasyāndhasaḥ । taratsa mandī dhāvati ॥
उस्रा वेद वसूनां मर्त्तस्य देव्यवसः । तरत्स मन्दी धावति ॥
usrā veda vasūnāṃ marttasya devyavasaḥ । taratsa mandī dhāvati ॥
ध्वस्रयोः पुरुषन्त्योरा सहस्राणि दद्महे । तरत्स मन्दी धावति ॥
dhvasrayoḥ puruṣantyorā sahasrāṇi dadmahe । taratsa mandī dhāvati ॥
आ ययोस्त्रिँशतं तना सहस्राणि च दद्महे । तरत्स मन्दी धावति ॥
ā yayostrim̐śataṃ tanā sahasrāṇi ca dadmahe । taratsa mandī dhāvati ॥
