ता नो वाजवतीरिष आशून्पिपृतमर्वतः । एन्द्रमग्निं च वोढवे ॥
tā no vājavatīriṣa āśūnpipṛtamarvataḥ । endramagniṃ ca voḍhave ॥
प्रो अयासीदिन्दुरिन्द्रस्य निष्कृतँ सखा सख्युर्न प्र मिनाति सङ्गिरम् । मर्य इव युवतिभिः समर्षति सोमः कलशे शतयाम्ना पथा ॥
pro ayāsīdindurindrasya niṣkṛtam̐ sakhā sakhyurna pra mināti saṅgiram । marya iva yuvatibhiḥ samarṣati somaḥ kalaśe śatayāmnā pathā ॥
प्र वो धियो मन्द्रयुवो विपन्युवः पनस्युवः संवरणेष्वक्रमुः । हरिं क्रीडन्तमभ्यनूषत स्तुभोऽभि धेनवः पयसेदशिश्रयुः ॥
pra vo dhiyo mandrayuvo vipanyuvaḥ panasyuvaḥ saṃvaraṇeṣvakramuḥ । hariṃ krīḍantamabhyanūṣata stubho'bhi dhenavaḥ payasedaśiśrayuḥ ॥
आ नः सोम संयतं पिप्युषीमिषमिन्दो पवस्व पवमान ऊर्मिणा । या नो दोहते त्रिरहन्नसश्चुषी क्षुमद्वाजवन्मधुमत्सुवीर्यम् ॥
ā naḥ soma saṃyataṃ pipyuṣīmiṣamindo pavasva pavamāna ūrmiṇā । yā no dohate trirahannasaścuṣī kṣumadvājavanmadhumatsuvīryam ॥
न किष्टं कर्मणा नशद्यश्चकार सदावृधम् । इन्द्रं न यज्ञैर्विश्वगूर्त्तमृभ्वसमधृष्टं धृष्णुमोजसा ॥
na kiṣṭaṃ karmaṇā naśadyaścakāra sadāvṛdham । indraṃ na yajñairviśvagūrttamṛbhvasamadhṛṣṭaṃ dhṛṣṇumojasā ॥
अषाढमुग्रं पृतनासु सासहिं यस्मिन्महीरुरुज्रयः । सं धेनवो जायमाने अनोनवुर्द्यावः क्षामीरनोनवुः ॥
aṣāḍhamugraṃ pṛtanāsu sāsahiṃ yasminmahīrurujrayaḥ । saṃ dhenavo jāyamāne anonavurdyāvaḥ kṣāmīranonavuḥ ॥
सखाय आ नि षीदत पुनानाय प्र गायत । शिशुं न यज्ञैः परि भूषत श्रिये ॥
sakhāya ā ni ṣīdata punānāya pra gāyata । śiśuṃ na yajñaiḥ pari bhūṣata śriye ॥
समी वत्सं न मातृभिः सृजता गयसाधनम् । देवाव्या३ं मदमभि द्विशवसम् ॥
samī vatsaṃ na mātṛbhiḥ sṛjatā gayasādhanam । devāvyā३ṃ madamabhi dviśavasam ॥
पुनाता दक्षसाधनं यथा शर्धाय वीतये । यथा मित्राय वरुणाय शन्तमम् ॥
punātā dakṣasādhanaṃ yathā śardhāya vītaye । yathā mitrāya varuṇāya śantamam ॥
प्र वाज्यक्षाः सहस्रधारस्तिरः पवित्रं वि वारमव्यम् ॥
pra vājyakṣāḥ sahasradhārastiraḥ pavitraṃ vi vāramavyam ॥
स वाज्यक्षाः सहस्ररेता अद्भिर्मृजानो गोभिः श्रीणानः ॥
sa vājyakṣāḥ sahasraretā adbhirmṛjāno gobhiḥ śrīṇānaḥ ॥
प्र सोम याहीन्द्रस्य कुक्षा नृभिर्येमानो अद्रिभिः सुतः ॥
pra soma yāhīndrasya kukṣā nṛbhiryemāno adribhiḥ sutaḥ ॥
ये सोमासः परावति ये अर्वावति सुन्विरे । ये वादः शर्यणावति ॥
ye somāsaḥ parāvati ye arvāvati sunvire । ye vādaḥ śaryaṇāvati ॥
य आर्जीकेषु कृत्वसु ये मध्ये पस्त्यानाम् । ये वा जनेषु पञ्चसु ॥
ya ārjīkeṣu kṛtvasu ye madhye pastyānām । ye vā janeṣu pañcasu ॥
ते नो वृष्टिं दिवस्परि पवन्तामा सुवीर्यम् । स्वाना देवास इन्दवः ॥
te no vṛṣṭiṃ divaspari pavantāmā suvīryam । svānā devāsa indavaḥ ॥
आ ते वत्सो मनो यमत्परमाच्चित्सधस्थात् । अग्ने त्वां कामये गिरा ॥
ā te vatso mano yamatparamāccitsadhasthāt । agne tvāṃ kāmaye girā ॥
पुरुत्रा हि सदृङ्ङसि दिशो विश्वा अनु प्रभुः । समत्सु त्वा हवामहे ॥
purutrā hi sadṛṅṅasi diśo viśvā anu prabhuḥ । samatsu tvā havāmahe ॥
समत्स्वग्निमवसे वाजयन्तो हवामहे । वाजेषु चित्रराधसम् ॥
samatsvagnimavase vājayanto havāmahe । vājeṣu citrarādhasam ॥
त्वं न इन्द्रा भर ओजो नृम्णँ शतक्रतो विचर्षणे । आ वीरं पृतनासहम् ॥
tvaṃ na indrā bhara ojo nṛmṇam̐ śatakrato vicarṣaṇe । ā vīraṃ pṛtanāsaham ॥
त्वँ हि नः पिता वसो त्वं माता शतक्रतो बभूविथ । अथा ते सुम्नमीमहे ॥
tvam̐ hi naḥ pitā vaso tvaṃ mātā śatakrato babhūvitha । athā te sumnamīmahe ॥
त्वाँ शुष्मिन्पुरुहूत वाजयन्तमुप ब्रुवे सहस्कृत । स नो रास्व सुवीर्यम् ॥
tvām̐ śuṣminpuruhūta vājayantamupa bruve sahaskṛta । sa no rāsva suvīryam ॥
यदिन्द्र चित्र म इह नास्ति त्वादातमद्रिवः । राधस्तन्नो विदद्वस उभयाहस्त्या भर ॥
yadindra citra ma iha nāsti tvādātamadrivaḥ । rādhastanno vidadvasa ubhayāhastyā bhara ॥
यन्मन्यसे वरेण्यमिन्द्र द्युक्षं तदा भर । विद्याम तस्य ते वयमकूपारस्य दावनः ॥
yanmanyase vareṇyamindra dyukṣaṃ tadā bhara । vidyāma tasya te vayamakūpārasya dāvanaḥ ॥
